Главная » Новости » Ушедсь анокламась Сергий Радонежскяень 700 киза шачема шистонза илати
15:34:35
Ушедсь анокламась Сергий Радонежскяень 700 киза шачема шистонза илати

 Мордовия Республикань национальнай политикань министерстваса 3-це февральста етась пуромкс рузонь масторонь подвижникть Сергий Радонежскяень 700 киза шачема шистонза илать коряс.
  Ня пуромксть эса ульсь министорсь – Анатолий Чушкин, Саранск ошень епархиянь секретарсь – протоиерей Виктор Хохлов и Мордовиянь митрополиянь архиереень секретарсь – протоиерей Александр Пелин.
  Корхтаф ульсь мероприятиятнень колга, конатнень пара улель етафтомс тя илать кизоста. Васенцекс арьсефкссь ульсь сянь эса, штоба оцюнятнень и священнослужительхнень вийсна россиянь народть ваймонц кемокстамста тяльхть юма-ара, а пачкодельхть историянь содама шикс школань, ссузонь и вузонь тонафнихненди.
  А историческяй примерсь сянь эса, што Русь масторса властьсь фалу нежетькшнесь народть кеме ваймонц лангс. Преданиянь коряс Сергий Радонежскяенди благославениянкса сашендсь сонць святой князсь Дмитрий Донской, анцесь молитват Куликовскяй паксяса тюремать инголе. Подвижниксь аф весть мирендафнезень фкя-фкянь еткова враждавай князьхнень. Тянкса нинге эрямань пингстонза Радонежскяй игуменць национальнай ваймонь вятикс, конань пильгс сюконякшнесть и князьхт, и баярхт, и священнослужительхт, и стак ломать.
  Российскяй Федерациянь Президентонь указсь 700 киза Сергий Радонежскяень шачема шистонза илать колга ульсь тяштьф нинге 2011 кизоня. Российскяй Федерациянь сембе государственнай властень оргононзонды ульсь максф указ примамс участия тя илати анокламаса. Тячи можна аф пелезь азомс, што Мордовия Республикаса анокламась ушедсь.

Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
...